విశాఖపట్నంలో జరిగిన Women Ayurveda Parishad Conference–2026 (WAPCON–2026) దేశంలో తొలి జాతీయ మహిళా ఆయుర్వేద పరిషత్ సదస్సుగా ప్రత్యేక గుర్తింపు తెచ్చుకుంది. ఆయుష్ శాఖ మద్దతుతో “స్వస్థ నారి – శశక్త భారత్” అనే థీమ్తో జరిగిన ఈ కాన్ఫరెన్స్ ఆరోగ్యవంతమైన మహిళ బలమైన కుటుంబం, సుస్థిర సమాజం, శక్తివంతమైన దేశానికి పునాది అనే సందేశాన్ని ఇచ్చింది.ఈ సదస్సులో మహిళల బహుముఖ పాత్ర, నాయకత్వం, అలాగే వారు ఎదుర్కొనే ప్రత్యేక ఆరోగ్య సవాళ్ల ( హార్మోనల్, మానసిక ఆరోగ్యం మొదలైనవి)పై నిపుణులు చర్చించారు. మహిళా ఆరోగ్యం మెరుగు పడితే భవిష్యత్తు తరాల సౌఖ్యం, పిల్లల విద్యా పురోగతి, కుటుంబాల ఆర్థిక స్థిరత్వం, సామాజిక భద్రత అన్నీ సుస్థిరంగా బలపడతాయని వైద్య నిపుణులు అభిప్రాయపడ్డారు. మహిళల ఆరోగ్యానికి ప్రాధాన్యత ఇచ్చే విధానాలు అవలంబించినప్పుడే సమాజంలో సమానత్వం, న్యాయం, అభివృద్ధి ధృడంగా నిలుస్తాయని ఈ సమావేశం స్పష్టం చేసింది.WAPCON–2026లో దేశం నలుమూలల నుంచి వచ్చిన ఆయుర్వేద వైద్య నిపుణులు, అధ్యాపకులు, విద్యార్థులు, పాలసీ నిర్ణేతలు పాల్గొన్నారు. మహిళలకు ఎదురయ్యే ఆరోగ్య అవరోధాలను తగ్గించే విధానాలు, ప్రివెంటివ్ కేర్, సంప్రదాయ ఆయుర్వేద జ్ఞానాన్ని ఆధునిక వైద్య విధానాలతో సమన్వయం చేసే మార్గాలు వంటి అంశాలపై విస్తృత చర్చలు జరిగాయి. ఈ చర్చల ద్వారా ఒక ఆరోగ్యవంతమైన, సమానత్వం కలిగిన, సాధికార భారత దేశ నిర్మాణంలో ఆయుర్వేద పాత్రను మరింత బలపరచాలి అనే లక్ష్యాన్ని WAPCON–2026 ముందుకు తెచ్చింది.ఈ సమావేశానికి ఫార్చ్యూన్ హాస్పిటాలిటీ అండ్ ఇన్ఫ్రా ఛైర్మన్ డాక్టర్ రామకృష్ణ గౌరవ అతిథిగా హాజరై, గ్లోబల్ ఆయుర్వేద–బ్యూటీ ఇండస్ట్రీపై తన అభిప్రాయాలను పంచుకున్నారు. ప్రపంచవ్యాప్తంగా 60 శాతానికి పైగా హెర్బల్ రా మెటీరియల్ భారతదేశం నుంచి ఎగుమతి అవుతుందని తెలిపారు. భారతీయ ఆయుర్వేద జ్ఞానం, దక్షిణ కొరియా ఇన్నోవేషన్, థాయ్లాండ్ సస్టైనబుల్ మాన్యుఫ్యాక్చరింగ్, ఆసియాలోని సమృద్ధి చెందిన ఔషధ మొక్కల సంపద—ఈ అన్నీ కలిపి, ఆధునిక విజ్ఞానం, క్లినికల్గా నిరూపించబడిన పద్ధతులు, కృత్రిమ మేధస్సు (AI), అభివృద్ధి చెందుతున్న క్వాంటం టెక్నాలజీలతో కలిసి, రాబోయే దశాబ్దాల్లో గ్లోబల్ బ్యూటీ ఇండస్ట్రీని పూర్తిగా మారుస్తాయని డా. రామకృష్ణ అన్నారు.ప్రకృతి సిద్ధమైన, ఆయుర్వేద ఆధారిత బ్యూటీ ఉత్పత్తుల్లో ఇప్పుడు పెట్టుబడులు పెడుతున్న వ్యాపారవేత్తలు భవిష్యత్తులో మంచి లాభాలు మాత్రమే కాకుండా, ఒక ఆరోగ్యవంతమైన, సుస్థిర సమాజ నిర్మాణానికి కూడా తోడ్పడగలరని ఆయన విశ్వాసం వ్యక్తం చేశారు. WAPCON–2026 వంటి వేదికల ద్వారా మహిళా ఆరోగ్యం, ఆయుర్వేదం, సస్టైనబుల్ బ్యూటీ రంగాలపై చైతన్యం పెరగడంతో “స్వస్థ నారి – శశక్త భారత్” లక్ష్యానికి మరింత ఉతం లభిస్తుందనే అభిప్రాయం వ్యక్తమైంది.
