మూవీ రివ్యూ: మెసేజ్తో పాటు మంచి యాక్షన్ను పంచే పొలిటికల్ డ్రామా.. ‘ధర్మస్థల నియోజకవర్గం’
నటీనటులు: సుమన్, సాయికుమార్, రాజీవ్ కనకాల, కస్తూరి, నటరాజ్, రాయంచ కొక్కుర, వరుణ్ సందేశ్, వితికా షేరు, రాజా రవీంద్ర, షఫీ, కాలకేయ ప్రభాకర్, పృథ్వి, శివకుమార్ తదితరులు
దర్శకత్వం: జై జ్ఞాన ప్రభ తోట
నిర్మాత: మేరుం భాస్కర్
సంగీతం: మహావీర్ ఏలేందర్
డీఓపీ: వెంకట హనుమ
ఎడిటింగ్: సాయిబాబు తలారి
లిరిక్స్: చంద్రబోస్
కథేంటి?
‘ధర్మస్థల నియోజకవర్గం’లో ఎమ్మెల్యే బైర్రాజు (సాయికుమార్) వరుసగా ఏడు సార్లు గెలిచి తనకు తిరుగులేదని భావిస్తుంటాడు. మరోవైపు అదే ప్రాంతంలో కాలేజీ నడుపుతున్న వాసుదేవ్ (రాజీవ్ కనకాల), అతని భార్య (కస్తూరి) విద్యార్థులను డ్రగ్స్కు బానిసలుగా మార్చి అక్రమంగా డబ్బు సంపాదిస్తుంటారు.
కాలేజీ లెక్చరర్ అరుంధతి (వితికా షేరు), విద్యార్థులు బద్రి (నటరాజ్), ఈషా (రాయంచ కొక్కుర) ఈ దందాను ఎదిరించడంతో పరిస్థితులు ఉద్రిక్తంగా మారతాయి. చివరకు బద్రి హత్యకు గురవుతాడు. తన కుమారుడి మరణానికి రాజకీయ అండదండలే కారణమని తెలుసుకున్న టీ కొట్టు నడిపే ఈశ్వరయ్య (సుమన్) రాజకీయాల్లోకి అడుగుపెడతాడు. డబ్బు, అధికారం, అనుచర బలం ఉన్న బైర్రాజును ఓ సామాన్యుడు ఎలా ఎదుర్కొన్నాడు? అనేదే మిగతా కథ.
ఎలా ఉంది?
యువతను డ్రగ్స్ ఎలా నాశనం చేస్తున్నాయనే సామాజిక అంశాన్ని తీసుకుని దానికి రాజకీయ నేపథ్యాన్ని జోడించడం సినిమాకు ప్రధాన బలం. దర్శకుడు జై జ్ఞాన ప్రభ తోట కథను పెద్దగా పక్కదారి పట్టించకుండా, పొలిటికల్ యాక్షన్తో పాటు ఒక సామాజిక సందేశాన్ని అందించే ప్రయత్నం చేశారు.
ఫస్ట్ హాఫ్లో కాలేజీ నేపథ్యంలో జరిగే డ్రగ్స్ వ్యవహారం, విద్యార్థుల తిరుగుబాటు, బద్రి హత్య వంటి అంశాలతో కథ ఆసక్తికరంగా సాగుతుంది. ఇంటర్వెల్కు వచ్చే కీలక మలుపు సెకండ్ హాఫ్పై క్యూరియాసిటీ పెంచుతుంది.
సెకండ్ హాఫ్లో ఈశ్వరయ్య రాజకీయాల్లోకి రావడంతో కథ పూర్తిగా రాజకీయ పోరాటం వైపు మళ్లుతుంది. బైర్రాజు ఆధిపత్యానికి ఈశ్వరయ్య సవాల్ విసరడం, ఎన్నికల ప్రచారం, తన కొడుకును చంపిన వారిపై పోరాటం వంటి సన్నివేశాలు ఆకట్టుకుంటాయి. ముఖ్యంగా ఓటు విలువ, ఉచిత పథకాల ప్రభావం వంటి అంశాలను సినిమాలో చర్చించడం ఆసక్తికరంగా అనిపిస్తుంది. చివర్లో ఇచ్చే సందేశం ప్రేక్షకులను ఆలోచింపజేస్తుంది.
నటీనటుల పనితీరు
సామాన్య టీ కొట్టు యజమాని ఈశ్వరయ్యగా సుమన్ తన పాత్రకు చక్కగా సరిపోయారు. ముఖ్యంగా సెకండ్ హాఫ్లో రాజకీయ నాయకుడిగా మారిన తర్వాత ఆయన నటన ఆకట్టుకుంటుంది. ఎమ్మెల్యే బైర్రాజుగా సాయికుమార్ పవర్ఫుల్గా కనిపించారు.
రాజీవ్ కనకాల విలన్గా క్రూరత్వాన్ని చూపిస్తూ మెప్పించారు. కస్తూరి నెగెటివ్ షేడ్స్ ఉన్న పాత్రలో బాగా ఒదిగిపోయారు. నటరాజ్, రాయంచ కొక్కుర తమ పాత్రలకు న్యాయం చేశారు. వితికా షేరు లెక్చరర్ పాత్రలో ఆకట్టుకున్నారు. శివకుమార్, రాజా రవీంద్ర, షఫీ, వరుణ్ సందేశ్, కాలకేయ ప్రభాకర్ తదితరులు తమ పరిధిలో మంచి నటన అందించారు.
సాంకేతిక విభాగం
డెబ్యూ దర్శకుడిగా జై జ్ఞాన ప్రభ తోట పొలిటికల్ యాక్షన్ డ్రామాను డీల్ చేసిన విధానం మెచ్చుకోదగినది. కథలోని సామాజిక అంశాన్ని కమర్షియల్ ఎలిమెంట్స్తో మేళవించే ప్రయత్నం చేశారు.
మహావీర్ ఏలేందర్ సంగీతం బాగుంది. ప్రముఖ గేయరచయిత చంద్రబోస్ రాసిన పాటలు సందర్భానుసారంగా ఆకట్టుకుంటాయి. వెంకట హనుమ సినిమాటోగ్రఫీ సినిమాకు ప్లస్. యాక్షన్ సన్నివేశాలను కూడా విజువల్గా బాగా చూపించారు. అయితే ఎడిటింగ్ మరింత షార్ప్గా ఉంటే సినిమా ఇంకా వేగంగా అనిపించేది.
నిర్మాత మేరుం భాస్కర్ నిర్మాణ విలువల్లో రాజీపడకుండా సినిమాను క్వాలిటీగా తెరకెక్కించారు.
ప్లస్ పాయింట్స్
సామాజిక అంశంతో కూడిన కథ
సుమన్, సాయికుమార్ నటన
ఇంటర్వెల్ ట్విస్ట్
పొలిటికల్ యాక్షన్ సన్నివేశాలు
ఓటు విలువపై ఇచ్చిన సందేశం
చంద్రబోస్ సాహిత్యం
మైనస్ పాయింట్స్
కొన్ని చోట్ల కథనం నెమ్మదించడం
ఎడిటింగ్ ఇంకాస్త క్రిస్ప్గా ఉండాల్సింది
కొన్ని సన్నివేశాలు మరింత బలంగా ఉండాల్సింది
తుది తీర్పు
యువతను పట్టిపీడిస్తున్న డ్రగ్స్ సమస్యను రాజకీయ నేపథ్యంతో ముడిపెట్టి తెరకెక్కించిన ‘ధర్మస్థల నియోజకవర్గం’ మంచి మెసేజ్తో కూడిన పొలిటికల్ యాక్షన్ డ్రామా. సుమన్, సాయికుమార్ నటన, ఇంటర్వెల్ ట్విస్ట్, సెకండ్ హాఫ్ పొలిటికల్ డ్రామా సినిమాకు ప్రధాన బలాలు. కొన్ని లోపాలు ఉన్నప్పటికీ సామాజిక సందేశంతో కూడిన పొలిటికల్ సినిమాలను ఇష్టపడే ప్రేక్షకులకు ఇది నచ్చే అవకాశముంది.
రేటింగ్: 3.25/5
